وقفة قصيرة

كل عام و الكل بخير و رمضان مبارك للجميع

بدأ شهر رمضان و حبيت اهني الجميع بهالمناسبة الحلوة

لكن طبعا ما راح اكون عسل اذا ما انتهزت الفرصة علشان اعلق على اللي اشوفه

المسلسلات الرمضانية خاصة الخليجية صارت عبارة عن عرض بايخ بدون اي معنى و القصص مكررة و لا وحدة منها لها اي دخل بمجتمعنا الخليجي و تعطي فكرة خاطئة للأجنبي اللي يشوفها

و الممثلات صاروا ينفعون فزاعات و متأكدة ان الاطفال لو يشوفونهم بدون ميك اب بيموتون خوف !! الوجه نصه براطم و النص الثاني خدود و بقدرة قادر صار لون العين اخضر او ازرق و الشعر اشقر فاتح و املس مع انه كان قبل فترة اسود و المشط ما يمر فيه و طبعا طبعا لازم كل فترة تشفط من البطن و الارداف و تنفخ و تكبر " اماكن ثانية " !!!!!! اتحدى اي ممثلة خليجية تطلع على الشاشة بالجمال الطبيعي و بدون ما تصبغ وجهها بثلاثة كيلو مكياج و لكن من تتجرأ منهم؟؟؟

اتمنى نشوف في رمضان مسلسل خليجي واقعي و يمثل الشعب الخليجي و مشاكله فعلا

اما برامج الفوازير و المسابقات صارت مملة و المذيعين حدهم سخيفين و اختيار المذيعات يكون على اساس من شكلها احلى و من تلبس ملابس اضيق و اقصر و ما يكون اسلوبها في الكلام مهم دامها لابسة قميص ضيق و تنورة قصيرة !!

صراحة انا حلفت من زمان اي احد يذكر اسم حليمة بولند قدامي بصفعه لأني كرهت حليمة بولند من اول ما شفتها و ما اعرف شنو يعجب الناس فيها غرورها او نكتها البايخة او تقديمها الفاشل؟؟

اتمنى ما زعلت احد لأني قلت الصراحة و احب اقول ان مو كل الممثلين مثل بعض و في منهم محترمين جدا و رمضان مبارك للكل

ملاحظة : اذا ما تبي تخرب صيامك لا تفتح التلفزيون في رمضان ابرك لك