" من اولها زفت"

استقبلتني المشرفة استقبالا حافلا<<<مين قدي

لدرجة انها دعتني لأشرف مكتبها<<<مو اختكم شخصية مهمة

المشرفة: انتين ماتستحين ، اول يوم دراسي و متأخرة ، الله يساعدنا على اللي جاي ، ليش متأخرة ؟

انا : أ أ أ

المشرفة"تصرخ" : انطقي.

و انا ما اعرف شنو اقول ، عشان وجه هالمشرفة اللي يشوفه ينسى مو بس اسمه الا ينسى كل حروف الهجاء، لكن بما اني خبيرة في مثل هالمواقف فكرت بسرعة و قلت : كنت مسافرة <<<احلمي يا بنت .
و مارجعت الا اليوم الفجر ، فوصلت متأخرة <<<هاذي

اكبر كذبة ، مو عائلتنا الكريمة ما

كلفت على عمرها تطلع من البيت

طول الاجازة الصيفية مو تسافر

بعد.

سكتت المشرفة و يظهر انها اقتنعت ، لكنها بدأت تأخذ بياناتي عشان تسجل مخالفة

المشرفة: اسمك؟

انا: عسل

المشرفة: انتي بأي صف؟

انا: اول.

المشرفة: أول شنو؟

انا: ماأدري توني واصلة المدرسة

سحبت المشرفة ملف من على الطاولة و بدأت تدور علي اسمي .

المشرفة: انتي بأول 11 .

أنا : حشى هالمدرسة فيها كم صف ، مدرستي الإعدادية كان فيها 5 صفوف لكل مرحلة بس ، لا و اثنين من هالخمسة صفوف خشبية .

المشرفة: مايهمني كم صف كان في مدرستش القديمة انتين في هالمدرسة و كــ...

سكتت المشرفة فجأة و لفت للدريشة <<<توضيح :دريشة يعني نافذة

و طلعت من المكتب و هي تركض فأكتشفت ان مشرفتنا تنفع تكون بطلة اولمبية ، طليت عشان اشوف شنو صار واكتشفت ان طالبة تعيسة الحظ مثل شكلي توها واصلة المدرسة و كانت تحاول تدخل بدون ما تشوفها المشرفة ، لكن ما قدرت ، عشان دريشة مكتب المشرفة تطل على باب المدرسة مباشرة و مستحيل يدخل او يطلع احد من المدرسة بدون ماتشوفة ، تقول غرفة الحارس .

ودخلت المشرفة مع الطالبة و خلتها توقف جنبي و صرخت عليها وعلي لين حست بألم في أحبالها الصوتية ، و بعدين قعدت على الكرسي و قامت تسجل مخالفة ، و بدأت في استجواب الطالبة ليال و كانت ياللعجب زميلتي في الصف اول 11

المشرفة: يظهر ان اول 11 راح يكون صف منحوس السنة ، دامكم انتو فيه ، قومو انقلعو على صفكم .
طلعنا من مكتب المشرفة أخيرا و نحن نتنفس الصعداء<<< اصلا اني ما ادري يعني شنو الصعداء
انا: مرحبا ليال ، اسمي عسل

ليال: اهلين ، صج هالمدرسة كبيرة ، اكبر من مدرستي القديمة بكثير .

انا : تعرفين وين صفنا؟

ليال: شلون بعرف و اني توني واصلة ، تعالي خل نروح يمين.

بعد ما درنا حول المدرسة كلها ثلاث مرات اكتشفنا ان الصف كان قدامنا من البداية و هو قريب من مكتب المشرفة اساسا ، و قبل ما نوصل للباب دق جرس الفسحة و طلع الكل من الصفوف .