يوم الاربعاء كان يوم دراسة تجي وراه ستة ايام اجازة بمناسبة عيد الاضحى<<< عيدكم مبارك بالمناسبة
فقررنا انا و ليال ان نفوت المدرسة يوم الاربعاء و نزيد في اجازتنا يوم واحد بس طبعا لسبب وجيه جدا جدا و هو ان في يوم الاربعاء ينعرض فيلم يبدأ الساعة 7 الصبح و يخلص الساعة 10 يعني في وقت الدراسة و احنا ما عندنا استعداد نفّوت هذا الفيلم ابدا .
يوم الثلاثاء الساعة 11 باليل :
كنت قاعدة قدام التلفزيون اتابع 3 حلقات متتالية من مسلسل تركي ما اعرف شنو اسمه او شنو قصته اصلا بس ما كنت نعسانة فكنت اسوي أي شي عشان اضيع وقت .
ماما : عسل ما راح تنامين بكرة عندج مدرسة .
انا: ما بروح المدرسة بكرة .
ماما: ليش يعني ؟
انا : ما عندنا شي مهم ، بس حصة كيمياء و انجليزي و فيزياء و جبر و انتي تعرفين اني ما افهم شي في هذي المواد فأروح المدرسة او لأ النتيجة وحدة .
ماما: اتروحين المدرسة يعني تروحين .
انا: ok .
و قررت اتبع الحيلة الخالدة و اقول اني مريضة عشان ما اروح المدرسة .
الساعة 1 باليل :
ما قدرت انام و قاعدة اتابع نفس المسلسل اللي ما فهمت منه أي شي لحد الآن .
الساعة 3 :
كنت اتقلب على السرير بس ما قدرت اغلب الارق و الملل كان فظيع لأن التلفزيون ما كو فيه شي حلو و المسلسل خلص من نص ساعة بدون ما استوعب شي منه و طبعا محد قاعد على المسن هالوقت .
الساعة 4:
قرأت قصة ما قبل النوم من مجلة اطفال و شغلت موسيقى كلاسيك مع العلم اني اكره هذا النوع من الموسيقى و عديت الخرفان اللي اتمنى تطيح على راس معلماتنا معلمة معلمة بس مع كل هذا ما قدرت انام .
الساعة 5:
الـــ 23 ساعة من عدم النوم اثروا على مخي شوي فقمت أدور في البيت شايلة مخدتي في يدي و شبشبي على راسي" يعني تخيلوا بنت مجنونة لابسة بيجامة عليها ميكي ماوس و شعرها منكوش و حولة "
الساعة 7 :
ماما قامت من النوم و ما كان فيه داعي امثل اني مريضة و اصبغ وجهي اصفر لأن عيني صارت اكبر من وجهي و لونها صار أحمر من قلة النوم .
ماما: عسل شفيج حبيبتي ليش جذي ويهج ؟؟
انا" باين ان عقلي صار فيه شي ": نووووووجاااكو شيتوفاريل بووووووووووووووووف
ماما: شنو عسل جنيتي ؟
انا:لأ بس تعبانة ابي انااااااااااااااااااااااااااااااام
ماما: ليش ما نمتي ؟
انا : لاا
ماما: و شلون بتروحين المدرسة و انتي جذي؟؟
انا: ما ابي اروح
ماما: بنتفاهم بعدين اللحين روحي جيبي لي شنطتي نسيتها في سيارة اخوج امس لما طلعنا .
انا: OK
دخلت سيارة مصطفى بو كشة و قمت ادور على الشنطة في المزبلة اللي يسميها سيارة و لقيتها في الكرسي الخلفي ، اخ شنطة ماما ناعمة و مريحة كأنها مخدة خليت عليها راسي صج احسن من مخدتي و الكرسي مريح و المكان هدوء وانا آآه و انا .... و انا رحت بسابع نومة ..
لما فتحت عيني تذكرت اني في سيارة مصطفى واضح اني تقلبت و طحت من الكرسي على ارضية السيارة ، مو مهم المهم اني نمت اخيرا حتى لو في سيارة فتحت الباب و نزلت من السيارة فاكتشفت اكتشاف رهيب .. السيارة ما كانت قدام بيتنا كانت قدام جامعة مصطفى !!!!!!
الغبي مصطفى قام من النوم متأخر كالعادة و طار بالسيارة للجامعة بدون ما يعرف اني موجودة !!
الساعة كانت 10 يعني بقيت نايمة بالسيارة 3 ساعات و الفيلم اللي سويت المصايب عشانه ما بقدر اشوفة ولأني لابسة بيجامة ميكي ماوس الحلوة ما اقدر انزل من السيارة ادور على مصطفى و طبعا ما عندي موبايل عشان اتصل فيه يعني مختصر الكلام انا محبوسة في السيارة لحد ما يجي مصطفى ..
لاااااااااااااااااااااااااااااااااااااااااااااااااااااااااااااااااااااااااا
بعد اطول ساعة في حياتي اخيرا تذكرت ماما ان عندها بنت اسمها عسل ما راحت المدرسة و مب موجودة في البيت فاتصلت بمصطفى عشان يرجع البيت و طبعا انا كنت في السيارة انتظره .
انا: صح النوم اخيرا وصلت .
مصطفى : شنو قاعدة تسوين في سيارتي.
انا: ما عمري شفت احد بغبائك كل هالعين مصيبة صابتك و ما شفتني نايمة في السيارة ؟
مصطفى : و الله محد خبرني ان سيارتي انقلبت سرير و انتي عندج حجرة نوم طول بعرض تتركينها و تنامين بسيارة ؟
انا: بسك كلام فاضي ذبحتنا اركب و خذني البيت زهقت من سيارتك .
تمنيت لو رحت المدرسة كان احسن لي من اللي صار اليوم و اكتشفت ان الفيلم راح ينعاد في اليوم نفسه .
الساعة 12 باليل "وقت اعادة الفيلم" جهزت شبس دوريتوس حجم عائلي و بيبسي و قعدت قدام التلفزيون ، موسيقى الفيلم حلوة و المكان هادي و الأريكة مريحة و أنا ..... نااااااااايمة .. خ خ خ خ
الاثنين، 30 نوفمبر 2009
هش انا نايمة
الأربعاء، 11 نوفمبر 2009
الامتحانات بدأت
السبت، 19 سبتمبر 2009
وردة
0Oo وردة واحدة~ لأنسان حي oO0
همسة : بادر بإظهار حبك لأحبتك لأنك لا تعلم متى يرحلون
الجمعة، 18 سبتمبر 2009
عملية " انهاء الباص X5"
مع أن معظم محاضراته تكون في وقت متأخر و انا ما اتاخر اكثر من ساعة ساعتين بس ..
لكن لعبته مكشوفه هو بس كسلان زيادة عن اللزوم و ما يبي يقوم من النوم مبكر <<<الله يساعدنا انا و كل طلاب المدارس على القومة من الفراش كل صبح قبل ما تطلع الشمس و انشالله يحسون فينا المسئولين ويأخرون الدراسة كم ساعة قولوا آآآآآآآآآآمين .
مختصر الكلام هذا كله ، اني بروح المدرسة و ارجع منها بباص الوزارة المعفن !!!!!!!!!!
لأ ، مش ممكن ، يالهوتيييييييييي
طبعا رفضت و نظمت الاحتجاجات و المظاهرات و اعلنت الاضراب لكن القيادة العليا لم تلين و يبست راسها و أعلنت ان القرار نهائي و لا رجعة فيه .
في اليوم اللي بعده "يوم تنفيذ قرار القيادة" قوموني من السرير غصب لأني كنت ناوية ما اروح المدرسة و اجبروني اروح موقف الباص انتظره مع باقي البنات تحت اشعة الشمس القاتلة اللي ما ترحم أحد<<< و كانت خسائرنا في ذاك اليوم تقدر بثلاث بنات اغمى عليهم من الحر و وحدة صادتها ضربة شمس و كانت بتطيح علينا بس الحمد لله قدرنا نلحقها بكمادات الثلج
وصلنا المدرسة بعد ما مرينا على كل مناطق البحرين بلا استثناء بالباص القديم المغبر كانت الحصة الاولى بدأت و فوتنا نصها بسبب الباص اللي يمشي ابطأ من سلحفاة عرجاء و حولة . ليال ما كانت بالمدرسة لأنها ما توصل في العادة قبل الحصة الثانية انشاالله توصل بسرعة عشان نتباحث و نفكر في طريقة نقنع فيها القيادة العليا يردون لي سائقي و سيارته النظيفة المريحة <<< مصطفى طالب جامعة عمره 20 سنة يعني سيارته مزبلة و ما ينظفها الا في السنة مرة بس مهما تكون سيارته بتبقى انظف من الباص بمليونين مرة .
وصلت ليالو و وقت الفسحة في الكافيتيريا بدينا ننظم العملية السرية " انهاء الباص X5 "
انا: و ليش X5 يعني ؟ ليش ما انسميها" انهاء الباص "و بس ؟
ليال: الظاهر ما تتابعين افلام انتي ، في الافلام اسم العملية لازم يكون فيه احرف و ارقام ما لها معنى .
انا: طيب ليش ؟
ليال: هذي القوانين اللي ماشية في العالم بتعترضين عليها بعد .
انا : مثل ما تبين الاسم مو المهم ، المهم شنو بنسوي ؟؟
ليال: شنو هالكآبة اللي نزلت مرة وحدة ، لهالدرجة الباص مأساة ؟
انا: و أكثر ، لو ركبت هالباص مرة ثانية راح تصيدني حالة نفسية و انجلط و اموت .
ليال: ههههه اقول خلنا في عمليتنا ابرك .
و بقينا طول الفسحة نفكر و نفكر و نفكر ...... بس الفكرة الجهنمية الخطيرة العبقرية اللي ما لها مثيل اللي كنا ننتظرها ما وصلت للأسف <<<مو ذنبنا ان عقولنا مقفلة و خاصية التفكير فيها ملغية
في النهاية اتفقنا على اني احاول مرة ثانية مع القيادة العليا لبيتنا " بابا و اخوي" وذكر تفاصيل الوضع المأساوي اللي عشته اليوم مع وايد دعاء و امنيات و تفاؤل مو في محله و لما دق جرس نهاية الفسحة بدأت العملية السرية " انهاء الباص X5 " رسميا
بدأ العذاب مرة ثانية وقت الرجعة للبيت و لحقت على الباص في آخر لحظة بس طاح مني نص درزينة اقلام و دفترين و انا اركض وراه ، انحشرت بين البنات و كل شوي وحدة تدوس على رجلي فأسحب شعرها او اعطيها بوكس يعلمها ما تقرب مني مرة ثانية ، بعد كم دقيقة بدينا نلاحظ دخان اسود يطلع من المحرك و الاصوات الغريبة اللي ما وقفت من دخلنا الباص بدأ صوتها يزيد و صرخ المحرك صرخته الاخيرة و استشهد المسكين بعد سنوات من المعاناة و المرض و طبعا و قف الباص في نص الشارع بدون حركة .
نزلنا كلنا من الباص و وقفنا تحت اشعة شمس البحرين اللطيفة الساعة 1:30 الظهر و السائق الآسيوي يفحص المحرك و هو يسب بلغته اللي ما نفهم منها حرف لكن بدون فايدة و كان واضح ان الباص ما راح يتحرك من مكانه و لو سنتيمتر واحد و اضطرينا نرجع بيوتنا مشي أو بكلمة ثانية زحف و احنا حاملين اثقال على ظهورنا .
لما وصلت البيت كنت بموت من التعب لدرجة اني نمت على طول بملابس المدرسة و شنطة المدرسة على ظهري و قومني صوت رسالةSMS من ليال تسألني عن عملية " انهاء الباص X5 " فقمت على طول و رحت ادور ابوي و حصلته في الصالة يقرأ جريدة فقعدت جنبه
انا: بابا ابي اكلمك عن موضوع مهم
بابا: شنو؟
انا: عن باص المدرسة ، بابا ....
بابا قاطعني قبل ما اكمل كلامي و قال : ما ابيج تروحين في باص الوزارة مرة ثانية ، مصطفى راح يوصلج المدرسة كل يوم .
مصطفى ابو كشة كان في الصالة يتابع فلم و بس سمع كلام بابا نط من مكانه و صرخ: شنو؟؟؟؟؟
بابا: مثل ما سمعت ، اختك ما بتروح في باص الوزارة مرة ثانية .
طلعت لساني لمصطفى و ركضت غرفتي و انا اصرخ مثل المهرجين و اتصلت لليال ابشرها على طول و ما فكرت ليش البابا غير رايه في يوم واحد .
بعد يومين اكتشفت ان الجريدة اللي كان البابا يقرأها في ذاك اليوم كانت ناشرة في الصفحة الاولى خبر عن طالب مدرسة مسكين توفى بسبب باص مدرسه داس عليه ، تألمت للحادثة وايد بس كان كل اللي همني هو اني ما راح استعمل باص الوزارة المقرف مرة ثانية و ان عملية " انهاء الباص X5 " انتهت بالنجاح .
==============================================================
في النهاية احب الفت نظر القارئ الى كل الطلاب اللي يعانون بسبب الباصات القديمة الي ما تنفع لاستخدام البشر و اللي ما تلقى صيانة كافية بدون التفكير في الطلاب و الطالبات اللي يستخدمونها ، واذا كنت انا محظوظة بوجود بديل ثاني عندي فبعض الطلاب ما يملكون هذا الشي و يضطرون يستعملونها رغما عنهم ، اتمنى الجهات المسؤولة تنتبه لهذا الشي و تبادر باصلاح هذا الوضع لتضمن سلامة عصب البلاد و مستقبلها " الطلاب و الطالبات"
الأحد، 6 سبتمبر 2009
رجعنا الصف متأخرين طبعا و دخلت المعلمة بعدنا مباشرة، أنا و ليال كنا على آخر كرسيين بالصف
بدأت المعلمة تلقي علينا المحاضرة المعتادة اللي لازم نسمعها في اول يوم دراسة عن الاختبارات و الدرجات و كل هالاشياء الي ما نبي نعرفها <<< صراحة هالمحاضرة ما اعرف شنو فايدتها ، احنا ما نبي نسمعها و المعلمة ما تبي تتعب نفسها و تعطينا تعليمات تعرف ان احنا ما راح نلتزم فيها ، بس شنو نسوي حكم القوي .
ما اعتقد ان من ضمن الخمسة و ثلاثين بنت اللي كانوا بالصف كان في احد يسمع ، انا كنت اعلك و ارسم على غلاف الكتاب و ليال خلت سماعات الجوال وراء خصلات شعرها و غمضت عينها و بدأت تهز رأسها مع ايقاع الموسيقى .
بعد ما خلصت المعلمة اخيرا من كلامها اللي محد سمعه اصلا قررت تبدأ تتعرف على البنات بالطريقة القديمة جداا _ بالدور كل بنت توقف و تقول اسمها بصوت عالي _ و هاذا اللي صار لين وصلت المعلمة لي انا و ليال
المعلمة: شنو اسمك؟
انا: ...........
ما جاوبتها
المعلمة: شسمك؟؟؟
انا "بكل برود": اسمي انا؟؟؟
المعلمة " بدأت تعصب": أي انتي ..
انا: بمناسبة الاسم ما عرفت شنو اسمش ، انتي شنو اسمش معلمة؟
المعلمة"بدأت في الغليان" : انتي ما يهمك شنو اسمي ، خلينا في اسمك انتي .
انا: OK ، ليش الصراخ معلمة ترا العصبية ابد مو زينة و ...
قاطعتني المعلمة"صار لونها مثل لون الطماطم": شنو اسمك؟
انا: اسمي عسل ، سلامتك معلمة ،ليش صار وجهك احمر؟؟
المعلمة ما ردت و واصلت <<<المغرورة، المفروض لها الشرف تتعرف على اسمي
و طبعا وصلت لليال اللي قاعدة في الكرسي اللي جنبي و ليال كانت في دنيا غير الدنيا و ما سمعت و لا كلمة من اللي انقالت و حدها مندمجة مع الاغنية اللي تسمعها
المعلمة: اسمك؟؟
ليال ما تدري بالمعلمة اصلا : يالتكسي خذني لها يالتكسي .. و بسكتك خلنا نمر ناخذ عطر رومنسي.... <<<هالبنت خالصة
دست على رجولها بقوة و آآآآآآآآآآآي شنو هالجوتي اللي لابسته الله يغربلها رجولي انكسرت و هي زين حست
فتحت ليال عينها فشافت المعلمة بطولها و عرضها و رجولها و ايدها و راسها اللي كأنه صفرية جدتي القديمة واقفة قدامها <<< راحت عليها
ابتسمت ليال ابتسامة كبيرة و قالت بكل براءة : نعم معلمة بغيتي شي
المعلمة كان باقي شوي و تطلع لها قرون و قامت تلعن ابو اليوم اللي شافت فيه اشكالنا فسحبت الجوال من ليال و قالت: هذا الجوال ما راح تشوفينه مرة ثانية الا اذا خلصت السنة الدراسية فاهمة ؟؟؟؟
ليال: بس معلمة ....
المعلمة : و لاكلمة .
و واصلت المعلمة طريقها و سألت باقي بنات الصف عن أسماءهم و بعدين عطت الصف محاضرة ثانية عن الأشياء الممنوع نجيبها معنا المدرسة " يعني الجوال و اخوه الايبود و ابن عمهم اللاب توب و باقي افراد العائلة الكريمة "
بس انا وليال ماسمعنا اللي قالته ، كنا نغني مع بعض بصوت خافت الاغنية الخالدة :
يالتكسي خذني لها يالتكسي
و بسكتك خلنا نمر ناخذ عطر رومانسي
مشتاقة ..حبيبتي مشتاقة
خذني لها بسرعة لا اسوي شي في نفسينا
الجمعة، 28 أغسطس 2009
وقفة قصيرة
الأربعاء، 15 يوليو 2009
" من اولها زفت"
استقبلتني المشرفة استقبالا حافلا<<<مين قدي
لدرجة انها دعتني لأشرف مكتبها<<<مو اختكم شخصية مهمة
المشرفة: انتين ماتستحين ، اول يوم دراسي و متأخرة ، الله يساعدنا على اللي جاي ، ليش متأخرة ؟
انا : أ أ أ
المشرفة"تصرخ" : انطقي.
و انا ما اعرف شنو اقول ، عشان وجه هالمشرفة اللي يشوفه ينسى مو بس اسمه الا ينسى كل حروف الهجاء، لكن بما اني خبيرة في مثل هالمواقف فكرت بسرعة و قلت : كنت مسافرة <<<احلمي يا بنت .
و مارجعت الا اليوم الفجر ، فوصلت متأخرة <<<هاذي
المشرفة: اسمك؟
انا: عسل
المشرفة: انتي بأي صف؟
انا: اول.
المشرفة: أول شنو؟
انا: ماأدري توني واصلة المدرسة
سحبت المشرفة ملف من على الطاولة و بدأت تدور علي اسمي .
المشرفة: انتي بأول 11 .
أنا : حشى هالمدرسة فيها كم صف ، مدرستي الإعدادية كان فيها 5 صفوف لكل مرحلة بس ، لا و اثنين من هالخمسة صفوف خشبية .
المشرفة: مايهمني كم صف كان في مدرستش القديمة انتين في هالمدرسة و كــ...
سكتت المشرفة فجأة و لفت للدريشة <<<توضيح :دريشة يعني نافذة
ودخلت المشرفة مع الطالبة و خلتها توقف جنبي و صرخت عليها وعلي لين حست بألم في أحبالها الصوتية ، و بعدين قعدت على الكرسي و قامت تسجل مخالفة ، و بدأت في استجواب الطالبة ليال و كانت ياللعجب زميلتي في الصف اول 11
المشرفة: يظهر ان اول 11 راح يكون صف منحوس السنة ، دامكم انتو فيه ، قومو انقلعو على صفكم .
طلعنا من مكتب المشرفة أخيرا و نحن نتنفس الصعداء<<< اصلا اني ما ادري يعني شنو الصعداء
انا: مرحبا ليال ، اسمي عسل