هش انا نايمة

هش انا نايمة

يوم الاربعاء كان يوم دراسة تجي وراه ستة ايام اجازة بمناسبة عيد الاضحى<<< عيدكم مبارك بالمناسبة
فقررنا انا و ليال ان نفوت المدرسة يوم الاربعاء و نزيد في اجازتنا يوم واحد بس طبعا لسبب وجيه جدا جدا و هو ان في يوم الاربعاء ينعرض فيلم يبدأ الساعة 7 الصبح و يخلص الساعة 10 يعني في وقت الدراسة و احنا ما عندنا استعداد نفّوت هذا الفيلم ابدا .

يوم الثلاثاء الساعة 11 باليل :

كنت قاعدة قدام التلفزيون اتابع 3 حلقات متتالية من مسلسل تركي ما اعرف شنو اسمه او شنو قصته اصلا بس ما كنت نعسانة فكنت اسوي أي شي عشان اضيع وقت .

ماما : عسل ما راح تنامين بكرة عندج مدرسة .

انا: ما بروح المدرسة بكرة .

ماما: ليش يعني ؟

انا : ما عندنا شي مهم ، بس حصة كيمياء و انجليزي و فيزياء و جبر و انتي تعرفين اني ما افهم شي في هذي المواد فأروح المدرسة او لأ النتيجة وحدة .

ماما: اتروحين المدرسة يعني تروحين .

انا: ok .

و قررت اتبع الحيلة الخالدة و اقول اني مريضة عشان ما اروح المدرسة .

الساعة 1 باليل :

ما قدرت انام و قاعدة اتابع نفس المسلسل اللي ما فهمت منه أي شي لحد الآن .

الساعة 3 :
كنت اتقلب على السرير بس ما قدرت اغلب الارق و الملل كان فظيع لأن التلفزيون ما كو فيه شي حلو و المسلسل خلص من نص ساعة بدون ما استوعب شي منه و طبعا محد قاعد على المسن هالوقت .

الساعة 4:
قرأت قصة ما قبل النوم من مجلة اطفال و شغلت موسيقى كلاسيك مع العلم اني اكره هذا النوع من الموسيقى و عديت الخرفان اللي اتمنى تطيح على راس معلماتنا معلمة معلمة بس مع كل هذا ما قدرت انام .

الساعة 5:
الـــ 23 ساعة من عدم النوم اثروا على مخي شوي فقمت أدور في البيت شايلة مخدتي في يدي و شبشبي على راسي" يعني تخيلوا بنت مجنونة لابسة بيجامة عليها ميكي ماوس و شعرها منكوش و حولة "

الساعة 7 :
ماما قامت من النوم و ما كان فيه داعي امثل اني مريضة و اصبغ وجهي اصفر لأن عيني صارت اكبر من وجهي و لونها صار أحمر من قلة النوم .
ماما: عسل شفيج حبيبتي ليش جذي ويهج ؟؟

انا" باين ان عقلي صار فيه شي ": نووووووجاااكو شيتوفاريل بووووووووووووووووف

ماما: شنو عسل جنيتي ؟

انا:لأ بس تعبانة ابي انااااااااااااااااااااااااااااااام

ماما: ليش ما نمتي ؟

انا : لاا

ماما: و شلون بتروحين المدرسة و انتي جذي؟؟

انا: ما ابي اروح

ماما: بنتفاهم بعدين اللحين روحي جيبي لي شنطتي نسيتها في سيارة اخوج امس لما طلعنا .

انا: OK

دخلت سيارة مصطفى بو كشة و قمت ادور على الشنطة في المزبلة اللي يسميها سيارة و لقيتها في الكرسي الخلفي ، اخ شنطة ماما ناعمة و مريحة كأنها مخدة خليت عليها راسي صج احسن من مخدتي و الكرسي مريح و المكان هدوء وانا آآه و انا .... و انا رحت بسابع نومة ..

لما فتحت عيني تذكرت اني في سيارة مصطفى واضح اني تقلبت و طحت من الكرسي على ارضية السيارة ، مو مهم المهم اني نمت اخيرا حتى لو في سيارة فتحت الباب و نزلت من السيارة فاكتشفت اكتشاف رهيب .. السيارة ما كانت قدام بيتنا كانت قدام جامعة مصطفى !!!!!!

الغبي مصطفى قام من النوم متأخر كالعادة و طار بالسيارة للجامعة بدون ما يعرف اني موجودة !!
الساعة كانت 10 يعني بقيت نايمة بالسيارة 3 ساعات و الفيلم اللي سويت المصايب عشانه ما بقدر اشوفة ولأني لابسة بيجامة ميكي ماوس الحلوة ما اقدر انزل من السيارة ادور على مصطفى و طبعا ما عندي موبايل عشان اتصل فيه يعني مختصر الكلام انا محبوسة في السيارة لحد ما يجي مصطفى ..

لاااااااااااااااااااااااااااااااااااااااااااااااااااااااااااااااااااااااااا

بعد اطول ساعة في حياتي اخيرا تذكرت ماما ان عندها بنت اسمها عسل ما راحت المدرسة و مب موجودة في البيت فاتصلت بمصطفى عشان يرجع البيت و طبعا انا كنت في السيارة انتظره .

انا: صح النوم اخيرا وصلت .

مصطفى : شنو قاعدة تسوين في سيارتي.

انا: ما عمري شفت احد بغبائك كل هالعين مصيبة صابتك و ما شفتني نايمة في السيارة ؟

مصطفى : و الله محد خبرني ان سيارتي انقلبت سرير و انتي عندج حجرة نوم طول بعرض تتركينها و تنامين بسيارة ؟

انا: بسك كلام فاضي ذبحتنا اركب و خذني البيت زهقت من سيارتك .

تمنيت لو رحت المدرسة كان احسن لي من اللي صار اليوم و اكتشفت ان الفيلم راح ينعاد في اليوم نفسه .

الساعة 12 باليل "وقت اعادة الفيلم" جهزت شبس دوريتوس حجم عائلي و بيبسي و قعدت قدام التلفزيون ، موسيقى الفيلم حلوة و المكان هادي و الأريكة مريحة و أنا ..... نااااااااايمة .. خ خ خ خ

الامتحانات بدأت

الامتحانات بدأت

مرت اسابيع على بداية الفصل الدراسي و طبعا انا و ليال بذلنا جهد نشكر عليه <<< مب في الدراسة في عمل المقالب للمعلمات .

و تعودت المشرفة على زيارتنا اليومية لها في مكتبها و حطمنا الرقم القياسي في عدد المخالفات اللي حصلناها ، بس صار وقت الجد لان الامتحانات بدأت و قررنا انا و ليال نعوض علاماتنا الزفت في الاختبارات الشهرية و لاول مرة في التاريخ راح ندرس للامتحان !!!!!

*

*

*

قعدنا في زاوية من زوايا الكافيتيريا قعدة محترمة تليق ببنات راح يحصلون العلامة النهائية في امتحان بكرة و كتبنا مكومة على الطاولة مسكت جدول الامتحانات و قلت : شنو هالمادة العجيبة اللي راح نقدمها اول مرة اسمع باسمها

سحبت ليال الجدول : انتي ماسكة الجدول بالمقلوب يالخبلة ! علينا امتحان فيزياء

انا : من متى و احنا ندرس فيزياء اصلا؟؟؟

ليال: اعتقد ان الفيزياء هي المادة اللي تعلمنا اياها المعلمة الطويلة الشقرا

انا : لأ اعتقد المعلمة الطويلة تعلمنا عقيدة و اسلاميات معلمة "دراكولا" هي اللي تعلمنا فيزياء

ليال: لا لا "دراكولا " تعلمنا لغة عربية .

بعد نقاش طويل توصلنا اخيرا الى ان الفيزياء هي المادة المليانة معادلات اللي تعلمنا اياها معلمة عواصف _عواطف سابقا_ و لما اكتشفنا هذا الاكتشاف الخطير دق جرس نهاية الفسحة فحملنا كتبنا و رجعنا الصف بدون ما نفتح أي كتاب .

*

*

لما رجعت البيت شفت كتاب الفيزياء في غرفتي بين الاطلال و اكتشفت اني ما فتحت هذا الكتاب و ما حركته من مكانه لمدة 4 اسابيع <<< يعني من بداية الدراسة

المهم استعنت على الشقا بالله و مسحت الغبار اللي تراكم على الكتاب و بدأت الدراسة .

بعد اربع ساعات كاملة من الدراسة مع استراحات قصيرة كل 10 دقايق يصل طول الاستراحة الواحدة الى ربع ساعة درست و بحمد الله تعالى خمس صفحات كاملة من الكتاب <<< تشمل الغلاف و المقدمة

و بعد الجهد الفظيع اللي بذلته قررت اني استاهل استراحة امضيها على الكمبيوتر

في اليوم اللي بعده قمت من النوم و رقبتي تألمني لأني نمت على كيبورد الكومبيوتر بعد ما مضيت امس كله على الشات اكلم صديقاتي و ما درست أي حرف بعد الصفحة الخامسة .

*

*

طبعا في الامتحان نسيت الصفحات الخمسة اللي درستها اصلا فألفت معادلات و ضربت كل الارقام و جمعتها مع بعض و طلعت من الامتحان فرحانة لأني ما بخلت على المصححين و سلمتهم سبع صفحات كاملة من المعادلات و الارقام ، ومن يدري يمكن تكون وحدة من المعادلات تركيبة لعلاج راح يكسر الدنيا و يعالج كل الامراض و افوز بجائزة نوبل !!!

*

*

العالمة العبقرية عسل